Niveli i Danubit mbetet i pandryshuar, me rritje minimale në 24 orët e fundit

Niveli i Danubit mbetet kryesisht i pandryshuar gjatë 24 orëve të fundit, ndërsa në disa pika u shënua një rritje minimale, njofton Agjencia Ekzekutive për Studimin dhe Mirëmbajtjen e Lumit Danub. Në stacionet hidrometrike të qyteteve Ruse, Lom dhe Novo Sello, niveli i ujit bie me 1-2 centimetra. Në Orjahovo, Nikopoll dhe Svishtov niveli mbetet i pandryshuar, ndërsa në Silistra u rrit me 4 centimetra.

Drejtoria e Mbikëqyrjes së Lundrimit njofton se nuk u konstatuan mjete lundruese të bllokuara brenda ose jashtë kanalit të lundrimit. Të gjitha kufizimet për thellësinë e lejuar të mjeteve lundruese mbeten në fuqi përgjatë gjithë segmentit bullgar të lumit. Situata hidrologjike mbetet e ndërlikuar.

Ditën e djeshme, në një pjesë të segmentit bullgar të Danubit u shënua një rritje minimale prej 1-2 centimetrash të nivelit të ujit, kujton Agjencia Telegrafike Bullgare (BTA). “Është ende herët të flasim për një rritje të qëndrueshme të nivelit të ujit. Pas mesit të shtatorit pritet që kjo të ndodhë gradualisht dhe të përmirësohen edhe kushtet e lundrimit”, tha për BNR prof. Emill Gaçev nga Instituti për Studimin e Klimës, Atmosferës dhe Ujërave pranë Akademisë Bullgare të Shkencave. Sipas tij, ajo që ndodhi gjatë verës është një sinjal serioz alarmi dhe situata të tilla do të bëhen gjithnjë e më të shpeshta.

Lexoni më shumë në arkivin tonë:

• Ulet fuqia e Centralit “Kozlloduj” për shkak të nivelit të ulët të Danubit
• Niveli historikisht i ulët i Danubit, më i ulëti në dekada, po shkakton probleme
• Niveli i ulët i Danubit zbuloi mbetje mamuthi pranë Rjahovos
• Muzeu në qytetin Ruse kërkon vullnetarë për kërkimin e artefakteve

Redaktoi: Diana Cankova

Përgatiti në shqip: Svetllana Dimitrova