Plovdivi është qendra e festimeve për 141-vjetorin e Bashkimit

Sot Bullgaria nderon “të gjithë ata, përpjekjet dhe përkushtimi i të cilëve bënë të mundur Bashkimin dhe lanë një shembull të pavdekshëm për brezat”. Këtë e shkroi Ministria e Punëve të Jashtme në profilin e saj në Facebook me rastin e 141-vjetorit të Bashkimit të Rumelisë Lindore me Principatën e Bullgarisë, duke uruar festën për të gjithë bullgarët.

“Para 141 vjetësh, bullgarët e shndërruan aspiratën për Bashkim në një vepër historike, e cila mbetet simbol i guximit, vendosmërisë shtetformuese dhe përgjegjësisë kombëtare”, shkruan ministria.

Kulmi i aktiviteteve për përvjetorin e Bashkimit zhvillohet në Plovdiv. Festimet nisën në katedralen “Shën Maria” me një shërbesë solemne lutjeje, të kryesuar nga Mitropoliti i Plovdivit, Nikollaj. Në fjalën e tij, ai tha: “Le të jemi paqebërës, t’i inkurajojmë edhe të tjerët të jenë të tillë dhe të jemi të bashkuar në parimet që na i ka lënë si trashëgimi Zoti ynë Jezu Krisht.”

Kjo ditë shënohet edhe në shumë qytete të tjera të vendit. Në Sofje u zhvillua një ceremoni solemne përpara mauzoleumit-varrezë të princit Aleksandër I Battenberg, njofton BGNES.

Mes pjesëmarrësve në program ishte edhe Njësia Kombëtare e Gardës, ndërsa kryetari i Bashkisë së Sofjes mbajti një fjalim. Ai theksoi se të gjithë bullgarët duhet të punojnë si një ekip i vetëm për një Bullgari të begatë dhe të mençur, ku zëri i secilit ka rëndësi.

Në orën 20:30, në sheshin “Bashkimi” në Plovdiv, do të mbahet ceremonia solemne me kontrollin ceremonial të nderit dhe fishekzjarre festive. Presidentja Ilijana Jotova do të pranojë formacionin e nderit.

Në orën 20:45, kreu i shtetit do të mbajë një fjalim me rastin e përvjetorit të Bashkimit.

Lexoni më tepër:

• Beteja diplomatike për Bullgarinë pas Bashkimit të vitit 1885
• Kryeministri Radev: Kur janë të bashkuar, bullgarët mund ta ndryshojnë historinë
• Në Pllovdiv hapet një ekspozitë kushtuar Bashkimit

Redaktoi: Miglena Ivanova

Përgatiti në shqip: Vesella Mançeva