Numër rekord kandidatësh janë regjistruar për zgjedhjet presidenciale

Një numër rekord prej 28 çiftesh kandidatësh për president dhe nënpresident do të marrin pjesë në zgjedhjet e 25 tetorit. Në zgjedhjet e mëparshme presidenciale, të mbajtura në vitin 2021, kandidatët ishin 23 çifte. 

Mes kandidatëve për votimin e 25 tetorit janë presidentja aktuale, një ish-kryeministër i përkohshëm, një ish-sekretar i përgjithshëm i Ministrisë së Brendshme, ish-ministra të qeverive të përkohshme, një këngëtare, një figurë e njohur nga “Big Brother”, një ish-i burgosur dhe veteranë të partive ekstreme. Kandidati më i moshuar për nënpresident është 82-vjeçari Lenin Stanoev. 

Sipas sondazheve sociologjike, pretendentët kryesorë janë çifti Ilijana Jotova - Kirill Vëllçev dhe Andrej Gjurov - Georgi Kandev. 

Partia “Vëzrazhdane” u regjistrua për pjesëmarrje në ditën e fundit të mundshme, më 22 shtator, me çiftin kandidat Kostadin Kostadinov - Petër Vollgin, i ka punuar për shumë vite si gazetare në Radion Kombëtare Bullgare. 

Në zgjedhjet e fundit presidenciale të vitit 2021, lideri i partisë Kostadin Kostadinov dhe deputetja Elena Gunçeva (e cila më vonë u largua nga partia) u renditën të katërtit me 104 832 vota, ose 3,92% të votave.

DPS-ja, e udhëhequr nga Deljan Peevski, u regjistrua për pjesëmarrje, por nuk paraqiti kandidat. Në vitin 2021, kandidatët e saj Mustafa Karadajë dhe Iskra Mihajllova morën 309 681 vota, ose 11,57% të votave, duke u renditur të tretët në raundin e parë.

Në zgjedhjet e mëparshme, votat e kësaj partie shpesh kishin rëndësi vendimtare në balotazhin presidencial.

Për herë të parë që nga themelimi i saj, partia GERB nuk u regjistrua për të marrë pjesë në zgjedhjet presidenciale.

 

Redaktoi: Ivo Ivanov

Përgatiti në shqip: Vesella Mançeva