Deri në mesin e muajit pritet të shpallet qyteti mikpritës i “Eurovision 2027”

Nëse qyteti mikpritës i “Eurovision 2027” do të jetë Sofja apo Burgasi, kjo do të bëhet e ditur të mërkurën, më 12 gusht, njofton EuroMix - Eurovision2026. Ky është një portal që ndjek gjithçka që lidhet me konkursin muzikor, por nuk është faqja zyrtare e “Eurovision”. Edhe nga Televizioni Kombëtar Bullgar (BNT) nuk ka ende një konfirmim zyrtar nëse e mërkura do të jetë dita e përzgjedhjes. Megjithatë, pritet që deri në fund të javës qyteti mikpritës të bëhet i njohur. 

Komisioni që bën përzgjedhjen duhej ta shpallte qytetin deri në fund të korrikut, por kjo nuk ndodhi. Deri atëherë, Sofja konsiderohej favoriti kryesor. Një javë më vonë, shanset u barazuan dhe të dy qytetet kishin rreth 50% mundësi për t’u zgjedhur. Pak më pas, Burgasi e kaloi kryeqytetin në faqet e basteve Bitget Wallet dhe Prediction Hunt. Megjithatë, zgjedhja e qytetit mikpritës nuk varet nga këto faqe. Vendimi përfundimtar merret bashkërisht nga Bashkimi Evropian i Transmetuesve (EBU) dhe BNT, shkruan 24chasa.bg. 

Menjëherë pas fitores së Darës me këngën e saj “Bangaranga”, e cila e solli konkursin në Bullgari, katër qytete, Sofja, Varna, Burgasi dhe Plovdivi, njoftuan se janë gati të presin “Eurovision”. Për t’u zgjedhur, një qytet duhet të përmbushë shumë kritere, ndër të cilat një sallë e përshtatshme, infrastruktura, hotelet dhe lidhjet ndërkombëtare të transportit. Në mesin e korrikut, Plovdivi dhe Varna u eliminuan nga gara për shkak të kritereve infrastrukturore dhe teknike.

• Sofja ose Burgasi do të jenë mikpritësit e Eurovision 2027

Falë fitores së Darës, Bullgaria kualifikohet automatikisht në konkurs, ndërsa edhe 17 shtete të tjera kanë shprehur tashmë interes për të marrë pjesë, ndër të cilat edhe Kosova.

Lexoni më tepër:

Redaktoi: Ivo Ivanov

Përgatiti në shqip: Vesella Mançeva