Janë marrë masa parandaluese për sigurinë e bazës ajrore ushtarake “Bezmer”

Janë ndërmarrë masa paraprake për sigurinë e bazës ajrore ushtarake “Bezmer”, ku janë dislokuar avionë ushtarakë amerikanë. Këtë e bëri të ditur Zëvendëskryeministri dhe Ministri i Punëve të Brendshme, Ivan Demerxhiev, duke theksuar se gjithçka po realizohet në koordinim me Ministrinë e Mbrojtjes, njoftoi gazetarja Marta Mlladenova.

Sipas ministrit, masat e marra janë përshtatur për një nivel kërcënimi shumë më të lartë se ai që raportohet aktualisht nga shërbimet e sigurisë dhe informacioni i disponueshëm.

“NATO është e gatshme të reagojë ndaj çdo kërcënimi dhe gjithmonë do të bëjë gjithçka që është e nevojshme për të mbrojtur anëtarët e saj”, deklaroi sot një zëdhënës i Aleancës në lidhje me informacionet se Irani po shqyrton mundësinë e sulmeve ndaj objektivave ushtarake amerikane në Evropë.

Më herët, gazeta “Financial Times” raportoi se “forcat iraniane po vlerësojnë mundësitë për goditje ndaj aseteve amerikane në Evropën Juglindore, për shembull në Bullgari, e cila muajin e kaluar miratoi përdorimin e bazës së saj ajrore ‘Bezmer’ për furnizimin me karburant të avionëve amerikanë”, kujton Radio Kombëtare Bullgare (BNR Horizont).

Lexoni më tepër në arkivin tonë: 

• Avionët amerikanë në Bezmer nuk e ndryshojnë qasjen tonë ndaj Iranit
• Aeroplanët amerikanë nuk na bëjnë palë në konfliktin me Iranin, tha Presidentja
• Irani: Vendosja e avionëve amerikanë në Bullgari është një vendim i rrezikshëm
• Komisioni për Mbrojtjen miratoi dislokimin e avionëve amerikanë në Bezmer
• SHBA-të kanë kërkuar urgjentisht vendosjen e avionëve cisternë në Bullgari

 

Redaktoi: Miglena Ivanova

Përgatiti në shqip: Vesella Mançeva