Ministri i Mbrojtjes: Nuk ka rrezik të drejtpërdrejtë për sigurinë kombëtare

“Nuk ka rrezik të drejtpërdrejtë për sigurinë kombëtare.” Kështu komentoi Ministri i Mbrojtjes, Dimitër Stojanov, në një artikull të publikuar në “Financial Times”, ku thuhej se forcat iraniane po vlerësojnë mundësitë për sulme ndaj aseteve amerikane në Evropën Juglindore, përfshirë Bullgarinë, e cila ka miratuar përdorimin e bazës ajrore “Bezmer” për furnizimin me karburant të avionëve amerikanë.

Ministri sqaroi se ka marrë një dokument nga Shërbimi i Inteligjencës Ushtarake, i cili garanton se nuk ekziston asnjë kërcënim as për objektet ku janë vendosur avionë amerikanë dhe as për objekte të tjera në territorin e Bullgarisë.

“Ne e monitorojmë situatën mjaft mirë, marrim informacione edhe nga shërbimet partnere dhe mendoj se aktualisht nuk ekziston një kërcënim i tillë ndaj vendit tonë”, tha ai.

Ndërkohë, një zëdhënës i NATO-s deklaroi se Aleanca është e gatshme të reagojë ndaj çdo kërcënimi dhe do të bëjë gjithçka që është e nevojshme për të mbrojtur vendet anëtare.

“Ministria e Mbrojtjes Kombëtare e Greqisë po shqyrton mundësinë e ofrimit të ndihmës për Bullgarinë me qëllim forcimin e mbrojtjes së saj kundërajrore dhe kundër raketave balistike, përmes dislokimit të sistemit ‘Patriot’, nëse paraqitet një kërkesë e tillë dhe nëse miratohet më pas nga Këshilli Qeveritar për Sigurinë Kombëtare”, raportoi për BTA agjencia greke ANA-MPA.

Lexoni më shumë në arkivin e Radio Bullgarisë:

• Janë marrë masa parandaluese për sigurinë e bazës ajrore ushtarake “Bezmer”
• Avionët amerikanë në Bezmer nuk e ndryshojnë qasjen tonë ndaj Iranit
• Aeroplanët amerikanë nuk na bëjnë palë në konfliktin me Iranin, tha Presidentja
• Irani: Vendosja e avionëve amerikanë në Bullgari është një vendim i rrezikshëm
• Komisioni për Mbrojtjen miratoi dislokimin e avionëve amerikanë në Bezmer
• SHBA-të kanë kërkuar urgjentisht vendosjen e avionëve cisternë në Bullgari

 

Redaktoi: Diana Cankova

Përgatiti në shqip: Vesella Mançeva