Ministri i Mbrojtjes mbështetet te mbrojtja raketore e NATO-s

Bullgaria nuk pret një sulm nga Irani dhe shteti ka ndërmarrë të gjitha masat e nevojshme për të kufizuar rreziqet që lidhen me vendosjen e avionëve cisternë ushtarakë amerikanë në bazën ajrore “Bezmer”. Këtë e deklaroi Ministri i Mbrojtjes, Dimitër Stojanov, për bTV. 

Ai siguroi se janë ndërmarrë masa shtesë, përfshirë vendosjen e sistemeve të mbrojtjes kundërajrore dhe forcimin e bashkëpunimit me Shtetet e Bashkuara dhe NATO-n. Stojanov shtoi se një sulm i mundshëm kundër Bullgarisë do të nënkuptonte aktivizimin e Nenit 5 të Traktatit të Atlantikut të Veriut. 

Sipas tij, sfida më e madhe janë frika dhe shqetësimet e njerëzve. 

“Nuk kam shkuar në Bezmer për të bindur, por për të ofruar informacion të besueshëm. Këto takime do të vazhdojnë”, premtoi ministri. 

Stojanov sqaroi se leja është dhënë për vendosjen e deri në 8 avionëve, por sipas vlerësimit të tij profesional, në “Bezmer” ka të ngjarë të dislokohen më pak, për shkak të kufizimeve infrastrukturore.

 

 Lexoni më shumë në arkivin tonë:

• SHBA premtojnë mbrojtje për Bullgarinë kundër Iranit

 

Redaktoi: Ivo Ivanov

Përgatiti në shqip: Vesella Mançeva